الزواج المسيحي

موضوع: الزواج المسيحي الأحد فبراير 08, 2009 6:12 pm

الجواز المسيحي
1/29/2009

ليه الواحد والواحدة عندنا مش مسموح ليهم يتجوزوا أكتر من شخص واحد؟؟؟؟,

خلينا الأول نرجع خطوة ونفهم إزاي الله خلقنا. الله خلقنا كروح لها نفس وجسد. إحنا تلاتة في واحد، يعني إحنا كائنات روحية. في 1 كورنثوس 17:6 بيتكلم عن حقيقة ان الله خلقنا عشان نكون واحد معاه بالروح. يعني الله عايز ان يبقي فيه بينا وبينه علاقة روحية وبولس بيتكلم في أفسس 5 عن العلاقة بين الله والانسان بالظبط زي علاقة الزواج اللي فيها يسوع هو العريس وإحنا العروس ونكون واحد معاه في الروح، هو جزء منا وإحنا جزء منه.
لكن إحنا مش بس كائنات روحية، إحنا لينا نفس بمعني ان عندنا مخ، أفكار، مشاعر وعواطف. عندنا برضه أجساد وأفكارنا فيها مشاعر جنسية وأجسادنا فيها القدرة علي التعبير عن المشاعر الجنسية الموجودة.
الله خلقنا كائنات جنسية وإحنا مانقدرش نهرب من الحقيقة ديه أو نغطيها وعشان كده خلق جسد الرجل والست عشان يدخلوا في علاقة مع بعض، وديه كانت فكرة الله من البداية مش فكرة إبليس. ممكن يكون إبليس شوه إدراكنا للأمور الجنسية لكن ده هيفضل خطة الله وقصده للجنس البشري.
و كانت خطة الله هي أن يكون الاتنين مع بعض في الروح، وواحد مع الله في الروح ويتحد الناس مع بعض في وحدة روحية. قصد الله لأولاده اللي بجد بيحبوه انهم يرتبطوا مع بعض من خلال الجواز لانه لما الوحدة ديه تكون موجودة في الجواز في العالم الروحي مع وجود قانون إلهي بأن اللي بيحصل في الروح بيأثر علي النفس واللي بيحصل في النفس بيأثر علي الجسد. و عشان كده إن كان فيه وحدة في العلاقة في الروح، ده هيأثر علي النفس وعلي الجسد في العلاقات.
عهد الزواج بيكون أدام شهود و ادام الله. بيدخلوا في عهد مع بعض من خلال العلاقة الزوجية و بعد لما ياخدوا العهد، الجواز بيكمل من خلال العلاقة الجنسية اللي بتبدأ الجواز وتتممه عشان كده كانت دايمًا الكنيسة بتقول انه لو ماحصلتش علاقة جنسية، الجواز مش كامل. وبدل من الطلاق، بيعملوا حاجة اسمها بطلان زواج لان الزواج لم يكتمل. فالعلاقة الجنسية بتكمل الجواز وتربط الأجساد مع بعض. الجواز المدني تحايل على القانون الإلاهي عشان الواحد يهرب من قدام ربنا ومن وجوده في العلاقة بس قدام الرب الكل معلوم وشايفة...
الكتاب المقدس مش بيتكلم عن الدخول مع بعض في علاقة جنسية انه لما يجتمع الاتنين معا لكنه بيقول في تكوين 24:2 "و يكون الإثنان جسدًا واحدًا"، الكتاب ماقالش انهم بيكونوا "جسمًا واحدًا"... يمكن يكونوا جسم واحد للحظة لكن هم فعلاً بيبقوا جسد واحد والجسد أكبر من الجسم، الجسد هو نفس وجسم مع بعض. والكتاب بيقصد انه بعد الدخول في العلاقة الجنسية، الاتنين بيرتبطوا لأن نفس كل واحد منهم التصقت بالتاني وأصبحوا واحد وهي ديه الوحدة اللي أرادها الله وهي ديه خطته ليعرفوا بعض بطريقة حميمة جداً. فحتي بعد انتهاء العلاقة الجنسية بيفضل حاجة من الزوجة جوا الزوج وحاجة من الزوج جوا الزوجة لانهم مرتبطين وفيه بينهم علاقة حميمة وعشان كده علي مر السنين بيقدروا يأثروا علي بعض بطريقة إيجابية ويقربوا أكتر من بعض وده ممكن ينعكس كمان علي شكلهم وساعات بنلاقي اتنين متجوزين بقالهم سنين شبه بعض.
من خلال الوحدة ديه بتتنقل البركات بين بعض وهو ده قصد الله لما قال في الوصية "لا تزن". للأسف في العالم اللي بنعيش فيه العلاقات الجنيسة خارج الزواج بقيت شئ عادي لكن العلاقات اللي بره الزواج أو الزني ليها عواقب .
في الزني الواحد بيتحد مع شخص تاني بطريقة غير اللي ربنا قصدها. لما ربنا قال لا تزن كان قصده: "ماتربطش نفسك بحد تاني بطريقة عكس الخطة الأساسية اللي أنا عايزها ليكوا".
في قوانين الله حاطتها عشان تحمينا وقانون الزواج انه يلتصق الرجل والمرأة في الزواج ولما الناس بتزني بيلتصقوا بحد تاني غير اللي هما متجوزينه وده اسمه "رباط النفس" لأن أنفسهم وأجسادهم ارتبطت والله مش بيغير القانون الأصلي للجواز عشان يدينا فرصة نغلط لان الرباط النفسي ده المفروض يحصل بس في الزواج فلما الناس تتخطي الحدود اللي الله حطها ويختاروا انهم يلتصقوا بناس تانية، بيبقي فيه رُبُط وقيود علي حياتهم!!!! 1 كو 6 بولس بيوصف اللي بيحصل لما حد يدخل في علاقة مع زانية ويقول "أم لستم تعلمون أن من التصق بزانية هو جسد واحد؟" و في تكوين 2: "يكونان جسدًا واحدًا". الالتصاق بيحصل و فيه حاجة من الراجل الزانية بتاخدها والعكس والحاجة اللي بياخدوها من بعض بتفضل جزء منهم لبقية حياتهم. الرباط ده بيقيد الواحد، الزني مش مجرد علاقة عابرة لكنها بتأثر علي النفس والروح بشكل غير نقي ولازم يحصل شفاء من العواقب ديه عشان الواحد يرجع للمكان اللي الله قصده لينا.
لما يكون لينا علاقة مع الله و نعبده بيملانا بروحه لكن في الزني، إحنا مش بنعبد الله بالتالي بنعبد إله هذا العالم اللي هو إبليس ولما نعبده بيدينا من روحه والجنس ده الغير نقي لازم الزاني يتحرر منه ومن نتائجه.
الزنا ببساطة هو التصاق بروح أخر فلما واحد يزني مع واحدة ده معناه انه بيلتصق بروحها وإذا زني مع واحدة تانية برضة هيلتصق بروحها ولو واحدة من اللي زنوا معاها ليها علاقات تانية فهو هيلتصق بأرواح الناس التانية دول والدايرة كده وسعت ومبقاتش زي ما ربنا قصد من الجنس والزواج وعشان كده الزني هي الحاجة الوحيدة اللي الكنيسة بتسمح بالطلاق بسببها. حتي لو الطلاق حصل، هما اخدوا عهد أمام الله ولما الطلاق بيحصل ده بينهي الجواز أدام الكنيسة والبلد لكن مش أدام الله عشان كده الكتاب بيقول "من تزوج بمطلقة فأنه يزني" لأنه لسه روحها ملتصقة بزوجها علي حسب العهد اللي أخدوه هما الاتنين أمام الله. حاجة واحدة بس هي اللي بتسمح بالجواز مرة تانية و هي موت أحد الأطراف، بس أن الموت يفصل بينهم وبكده يكون عهد الزواج انتهي والأرمل أو الأرملة ممكن يتجوز أو تتجوز تاني لأنه التزم بالعهد أمام الله للنهاية.
الله ماكنش بس هدفه اننا نكون واحد في الروح في الجواز بس عشان فيه ناس بتجمعنا بهم علاقات روحية نقية لكن مش هندخل معاهم في علاقة جواز. الله عايزنا في العلاقة الزوجية نستخدم فيها كل كياننا عشان نعبر عن العلاقة، من عواطف ومشاعر وأفكار... عشان كده مش بنتجوز حد عشان هو بس بيصلي كويس لكن لازم نفتكر اننا لازم نكون بنحب الشخص ده عشان هنعيش معاه علي الأقل العشرين سنة اللي جايين وعشان كده لازم تجمعنا مشاعر واهتمامات ورغبات مشتركة وبكده نعيش العلاقة زي ما ربنا قصدها اننا نكون واحد في الروح، والنفس في الذهن والأفكار والعواطف والمشاعر ولما نقدر نستمتع بالوحدة في كل المجالات ديه، ممكن نقرر ساعتها إننا ندخل في عهد مع بعض بالزواج فتكتمل الوحدة ديه جسديًا كمان.

وافتكر ان انت نتيجة اختياراتك،
منقول
هانعيشهاصح

اقتباس :

الكتاب المقدس مش بيتكلم عن الدخول مع بعض في علاقة جنسية انه لما يجتمع الاتنين معا لكنه بيقول في تكوين 24:2 "و يكون الإثنان جسدًا واحدًا"، الكتاب ماقالش انهم بيكونوا "جسمًا واحدًا"... يمكن يكونوا جسم واحد للحظة لكن هم فعلاً بيبقوا جسد واحد والجسد أكبر من الجسم، الجسد هو نفس وجسم مع بعض. والكتاب بيقصد انه بعد الدخول في العلاقة الجنسية، الاتنين بيرتبطوا لأن نفس كل واحد منهم التصقت بالتاني وأصبحوا واحد وهي ديه الوحدة اللي أرادها الله

توضيح اكثر من رائع
شكرا ليك اخونا الحبيب
ربنا يبارك تعب محبتك الكبيرة

» مجلة الفكر المسيحي
» ايماننا المسيحي للقمص هدرا اسحق