كيف تكون واثق من نفسك

الثقة بالنفس

الثقة بالنفس ماهيتها وكيفية الحصول عليها رغم عثرات العمل بالسفر الفاشل والمتكرروهل مشيئة الله لي أن لا أوفق في السفر
,

مفيش حد في الدنيا دي معندوش إحساس بالنقص في نقطة معينة من حياته سواء كانت جسدية أو نفسية .... لكن المهم هنا الشخص بيبص لنفسه إزاي؟ وهل آراء الناس هي اللي بترفعه أو بتنزله أو بتوديه وتجيبه في كل اتجاه؟

يعنى مثلاً لو عايز تقيس شخصية شخص بمقياس معين .... فممكن تقول ياه ده مرح جداً... و لطيف جداً... و شاطر جداً... و نفس الشخص ده حد تاني يشوفه دمه تقيل ولسانه مش حلو... فكل واحد له مقياس بحسب فكره .... فمش ممكن الناس كلها تتفق على حاجة واحدة.... حاجة تلخبط مش كده؟

طيب أنا عايزة مثلاً أقيس شخصية حد معين ومش عارفة أحكم صح لأني مش عارفة هحكم على أي أساس.... و مش عايزة من ناحية تانية أشوف من خلال عينين الناس...

و هنا نيجي لأهم نقطة....
بما إن مفيش حد كامل في الدنيا إلا إلهنا الصالح.... فإحنا كمسيحيين لما بنقيس أي حاجة أو بمعنى تاني عايزين نحط مقياس لأي موضوع بيكون المقياس ده هو يسوع نفسه وتعاليمه.

يعنى عايز تقول مثلاً الشخص ده أخلاقة وسلوكه كويس ولا لأ؟ وممكن يكون الشخص ده ملتوي...وله علاقات مش مظبوطة ومع كده فيه ناس تشوفه شخص رائع وشاطر عارف يمشي أموره... (إنما في النهاية الشخص ده هتبقى أتعابه كتيرة وده مش موضوعنا)..... فمين اللي ممكن نقول مثلاً ده أخلاقة كويسة وسلوكه مستقيم ...إلخ من الصفات .... هنا المقياس بيكون رب المجد.... يعني الإنسان اللي بيعيش بطهارة وأمانة..إلخ بحسب الإنجيل هو ده الشخص الكويس.

الثقة بالنفس هي إنك تبقى متأكد إن كل قراراتك صح – على الأقل من وجهة نظرك – وضروري تكون مسنودة بتعاليم الكتاب المقدس...

و إيه كمان الشيء اللي بيكون معضد للإنسان وبيديله ثقة في نفسه وبترفعه؟ كمية المحبة اللي بياخدها من اللي حواليه والصورة اللي بيشوف نفسه عليها في عينين اللي حواليه.

و لكن زى الكتاب المقدس ما بيقول "ملعون كل من اتكل على ذراع بشر".... لأنه بكده أنا ثقتي بنفسي هتبقى رهن نظرة الناس لي و لازم هيكون كل حرصي إني آخذ رضاهم عشان في النهاية أشوف في عينيهم الرضى عنى وبالتالي أثق في نفسي.... الحقيقة هي دايرة مش لذيذة....

و لكن يا بختنا بإلهنا لأن شعورنا بمحبته اللي بتملي قلبنا بترفعنا وبتخلينا فرحانين مش محتاجين أي استعطاف من حد زي النبي اللي بيقول في المزمور" معك لا أريد شيئاً على الأرض".

هنا ممكن تكون نقطة الثقة بالنفس وضحتلك شوية.... أما بالنسبة لمشيئة الرب في حياتك في..... سفر/شغل/ جواز... أي قرار ده بيرجع لعلاقتك مع الرب وقدرتك على سماع صوته في حياتك.

فهل إني ليك علاقة حية بيسوع في حياتك... ولا بتاخد كل قراراتك على تخمينات؟

لو عايز الحكمة والمحبة الإلهية وازاي تتعرف على يسوع... ارفع قلبك ليسوع دلوقتي وأطلب منه إنه يدخل قلبك ويستلم حياتك بكل ما فيها و ثق إنه قريب منك جداً أكتر من نفسك وبيحس بك أوي ونفسه يساعدك ويرشدك ويتكلم معاك ويريحك ويفرحك ويساعدك إنك تميز بين الصح والغلط وهو بينتظر منك الخطوة دي بفارغ الصبر (فهو واقف على الباب و يقرع) لأنه بيحبك أنت شخصيا أوي أوي لدرجة إنه مات عشانك إنت.
ولما تتطلب منه كدا هتكتشف أن كل الدنيا بتختلف وازاي أنه هينور لك طريق حياتك كلها وهيقويك وابدأ حياة جديدة بإنك تتكلم معاه كصديق شخصي ليك وده بيبقى بقراءة الكتاب المقدس كل يوم والصلاة واطلب منه المساعدة والحكمة وثق أنه هيديلك وكتير

منقول

موضوع اكثر من رائع شكرا ليك جدا
اخونا الغالى
ربنا يعوض تعب محبتك

» استكشف نفسك في نور محبة المصلوب